ថ្ងៃអង្គារ៍ ទី២៨ ខែកញ្ញា ឆ្នាំ២០២១
គេហទំព័រ អេអឹមអឹម កំពុងសាកល្បងផ្សាយ
លោកជំទាវ យក់ សម្បត្តិ ៖ ក្រសួងធានាថានឹងមានវ៉ាក់សាំង ចាក់ជូនគ្រប់ជនគោលដៅទាំងអស់ នៅទូទាំងប្រទេស
Sat,31 July 2021 (Time 01:35 PM)
ដោយ ៖ ammhotnews (ចំនួនអ្នកអាន: 27នាក់)

ភ្នំពេញ: ថ្ងៃទី៣១ ខែកក្កដា ឆ្នាំ២០២១

វ៉ាក់សាំងស៊ីណូវ៉ាក់ ចំនួន ០១លានដូសបន្ថែមទៀត ដែលកម្ពុជាបានបញ្ជាទិញពីប្រទេសចិន បានមកដល់កម្ពុជាហើយ នាព្រឹកថ្ងៃទី៣១ ខែកក្កដា ឆ្នាំ២០២១ នេះ ហើយវ៉ាក់សាំងជាច្រើនដូសទៀត នឹងមកដល់ជាបន្តបន្ទាប់ទៀតនៅខែសីហាខាងមុខនេះ ដែលស្របពេលនឹងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់កុមារ និងជំទង់ ដែលមានអាយុពី ១២ឆ្នាំ ដល់ ១៧ឆ្នាំ។ នេះបើតាមការឱ្យដឹងពីលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ក្នុងឱកាសទៅទទួលវ៉ាក់សាំងនៅព្រលានយន្តហោះអន្តរជាតិភ្នំពេញ។

លោកជំទាវ យក់ សម្បត្តិ បានបញ្ជាក់បន្ថែមថា ៖ “នៅថ្ងៃទី០១ ខែសីហា ស្អែកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាយើង នឹងអញ្ជើញជាអធិបតីក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់កុមារ និងជំទង់ ដែលមានអាយុពី ១២ឆ្នាំ ដល់ក្រោម ១៨ឆ្នាំ ដោយប្រើវ៉ាក់សាំងប្រភេទស៊ីណូវ៉ាក់នេះ ហើយយើងក៏បានត្រៀមវ៉ាក់សាំងវ៉ាក់សាំងស៊ីណូវ៉ាក់នេះរួចរាល់ហើយដែរ ដោយយើងមានវ៉ាក់សាំងគ្រប់គ្រាន់ក្នុងដៃ ហើយថែមនឹងការមកដល់ជាបន្តបន្ទាប់ទៀតនោះ គឺយើងមានវ៉ាក់សាំងមិនខ្វះទេ សម្រាប់យុទ្ធនាការចាក់វ៉ាក់សាំងនេះ ដោយយើងមានវ៉ាក់សាំងយុទ្ធសាស្រ្តតាមរយៈការបញ្ជាទិញ និងវ៉ាក់សាំងគាំទ្រតាមរយៈជំនួយ ហើយដែលគ្រោងនឹងទទួលបានវ៉ាក់សាំងសរុបជាង ២៦លានដូស ត្រឹមខែពាក់កណ្តាលខែសីហានេះ”។

ដោយឡែក ពាក់ព័ន្ធនឹងវ៉ាក់សាំង អាស្រ្តាហ្សេនេកា និងវ៉ាក់សាំង ចនសុនអែនចនសុន ដែលកម្ពុជាទទួលបានពីជំនួយរបស់ជប៉ុន និងអាមេរិក កន្លងទៅថ្មីៗនេះ ក្រសួងសុខាភិបាល មានផែនការរួចហើយទៅតាមផែនការចាក់វ៉ាក់សាំងរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ (គ.វ.ក១៩) ក្នុងក្របខណ្ឌទូទាំងប្រទេស ទៅតាមបណ្តាខេត្តដែលប្រឈមទាំង០៩ នៅតាមព្រំដែន។

លោកជំទាវ បានឱ្យដឹងផងដែរថា បន្ទាប់ពីចក្រភពអង់គ្លេសបានប្រកាសបរិច្ចាគវ៉ាក់សាំងកូវីដ-១៩ AstraZeneca ចំនួន ៤១៥ ០០០ដូស ដល់កម្ពុជាតាមរយៈកិច្ចព្រមព្រៀងទ្វេភាគី និងយន្តការ COVAX ដើម្បីដោះស្រាយបញ្ហាកូវីដ-១៩នោះ ក្រសួងទទួលបានព័ត៌មានចុងក្រោយថាវ៉ាក់សាំងនេះ នឹងមកដល់ក្នុងអំឡុង ថ្ងៃទី០៣ ឬថ្ងៃទី០៤ ខែសីហាខាងមុខនេះ។

ពាក់ព័ន្ធនឹងប្រភេទវ៉ាក់សាំង ឬក៏ប្រសិទ្ធភាពនៃវ៉ាក់សាំងវិញ លោកជំទាវ យក់ សម្បត្តិ បានបញ្ជាក់ថា គ្រប់វ៉ាក់សាំងទាំងអស់ សុទ្ធតែបានសិក្សាស្រាវជ្រាវដោយក្រុមអ្នកវិទ្យាសាស្រ្តរបស់ក្រុមហ៊ុនបានយ៉ាងល្អិតល្អន់ហើយ ដូច្នេះចំពោះចំណុចនេះគឺពុំមែនជាបញ្ហានោះទេ។ បញ្ហាគឺនៅត្រង់ថា បន្ទាប់ពីចាក់វ៉ាក់សាំងហើយ គឺយើងមានកងការពារមួយចំណែកប៉ុណ្ណោះ ហើយមួយចំណែកទៀត គឺការពារខ្លួនដោយអនុវត្តវិធានការ ០៣ការពារ និង០៣កុំ។

គិតត្រឹមថ្ងៃទី៣១ ខែកក្កដា ឆ្នាំ២០២១នេះ កម្ពុជាបានទទួលវ៉ាក់សាំងបង្ការជំងឺកូវីដ-១៩ ចំនួនប្រមាណ ១៨ ៨១១ ០០០ដូស រួចមកហើយ ក្នុងនោះ វ៉ាក់សាំងស៊ីណូវ៉ាក់ (Sinovac) ដែលបញ្ជាទិញពីប្រទេសចិន មានចំនួន ១១លាន៥សែនដូស វ៉ាក់សាំងស៊ីណូហ្វាម (Sinopharm) មានចំនួន ៦លាន២សែនដូស (៣លានដូសបញ្ជាទិញ) និងវ៉ាក់សាំងកូវីសែល (Covishield) ដែលទទួលបានអាជ្ញាបណ្ណផលិតដោយ អាស្រ្តាហ្សេនេកា (AstraZeneca) ដែលជាអំណោយអង្គការសុខភាពពិភពលោក តាមរយៈយន្តការកូវ៉ាក់ (Covax Facility) មានចំនួន ៣សែន២ម៉ឺន៤ពាន់ដូស និងជំនួយរបស់ជប៉ុន តាមរយៈយន្តការកូវ៉ាក់ (Covax Facility) ដូចគ្នា មានចំនួន ៣សែន៣ម៉ឺន២ពាន់ដូស (ក្នុងគម្រោង ១លានដូស) និងវ៉ាក់សាំង Johnson and Johnson ដែលជាជំនួយសហរដ្ឋអាមេរិកចំនួន ៤៥៥ ០០០ដូស៕
ដោយ ផែន រតនៈ

ព័ត៌មានគួរចាប់អារម្មណ៍

ឯកឧត្តម គួច ចំរើន អញ្ជើញចុះសំណេះសំណាលជាមួយក្រុមយុវជនស្ម័គ្រចិត្តសហភាពសហព័ន្ធយុវជន​កម្ពុជា ស្រុកស្ទឹងហាវ (ammhotnews)

ព័ត៌មានគួរចាប់អារម្មណ៍

វិធានការ ៣កុំ ៣ការពារ និងវ៉ាក់សាំង រូបមន្តបញ្ជៀសការឆ្លងវីរ៉ុសកូវីដ-១៩ ! (ammhotnews)

ព័ត៌មានគួរចាប់អារម្មណ៍

ក្រុមឆៀកចល័តធ្វើការពិន័យដល់ម្ចាស់យានយន្តហួសសុពលភាពក្នុង១ថ្ងៃ៥០០ទៅ២០០០រៀល (ammhotnews)

ព័ត៌មានគួរចាប់អារម្មណ៍

សម្តេចតេជោ ហ៊ុន សែន ជួបពិភាក្សាការងារជាមួយអ្នករាយការណ៍ពិសេសរបស់ អ ស ប ទទួលបន្ទុកសិទ្ធិមនុស្សប្រចាំកម្ពុជា ()

ព័ត៌មានគួរចាប់អារម្មណ៍

ឧត្តមសេនីយ៍ឯក ហ៊ុន ម៉ាណែត ទទួលជួបពិភាក្សាការងារជាមួយអនុព័ន្ធយោធាវៀតណាម ប្រចាំនៅកម្ពុជា (ammhotnews)

វីដែអូ

ចំនួនអ្នកទស្សនា

ថ្ងៃនេះ :
145 នាក់
ម្សិលមិញ :
337 នាក់
សប្តាហ៍នេះ :
2431 នាក់
ខែនេះ :
9227 នាក់
3 ខែនេះ :
27155 នាក់
សរុប :
111369 នាក់